Dybala ថា​ "គ្មាន​ហេតុផល​ដែល Juventus ត្រូវ​ច្រណែន Barca , Real ឬ Bayern ​ឡើយ"

Paulo Dybala ​ថា​ខ្លួន​កំពុង​តែ​លេង​ឱ្យ​ក្លឹប​ដែល​មាន​កម្រិត​ស្មើ​ទៅ​នឹង​ក្រុម FC Barcelona , Real Madrid ​និង Bayern Munich ​ហើយ​ក៏​គ្មាន​ការ​ច្រណែន​ទៅ​នឹង​ក្លឹប​ទាំង​នេះ​ដែរ។

Dybala ​បាន​ចុះ​កុងត្រា​ថ្មី​ជាមួយ Juventus ​រយៈ​ពេល​៥​ឆ្នាំ​កាល​ពី​ថ្ងៃ​ព្រហស្បតិ៍​សប្ដាហ៍​មុន ​ពោល​គឺ​២​ថ្ងៃ​ក្រោយ​ពី​រូបគេ​បាន​ជួយ​ក្រុម​ឈ្នះ​ Barcelona ​ក្នុង​លទ្ធផល ៣-០ ​នៅ​ជើង​ទី​១​ពាន​រង្វាន់ UEFA Champions League ។ ដោយ​ការ​ចុះ​កុងត្រា​នោះ ​បាន​ធ្វើ​ឱ្យ​ក្លឹប​ធំ​ៗ​ជា​ច្រើន​ដែល​ចង់​បាន​ខ្សែ​ប្រយុទ្ធ​រូប​នេះ ​មិន​សប្បាយ​ចិត្ត​នោះ​ទេ ត្បិត​អី​តម្លៃ​ខ្លួន​របស់​គេ​ក៏​នឹង​អាច​កើន​ឡើង​ទៅ​តាម​កុងត្រា​នោះ​ដែរ។

យ៉ាងណាមិញ ​ក្រោយ​ចុះ​កុងត្រា​នោះ កីឡាករ​សញ្ជាតិ​អាហ្សង់ទីន​បាន​និយាយ​ថា​៖ “វា​ជា​ពេល​ល្អ​សម្រាប់​អាជីព​របស់​ខ្ញុំ។ ខ្ញុំ​មាន​អារម្មណ៍​សប្បាយ​ចិត្ត​នៅ​លើ​ទីលាន ខ្ញុំ​កំពុង​នៅ​ក្លឹប​ដែល​គ្មាន​អ្វី​ត្រូវ​ច្រណែន​ជាមួយ​ក្រុម Barcelona , Real Madrid ​និង Bayern Munich ​ទេ។ អ្នក​គាំទ្រ មិត្ត​រួម​អាជីព ​និង​ក្លឹប ​បាន​ធ្វើ​ឱ្យ​ខ្ញុំ​មាន​អារម្មណ៍​យ៉ាង​នេះ។ នេះ​ជា​ហេតុផល​ធ្វើ​ឱ្យ​ខ្ញុំ គ្មាន​អ្វី​ត្រូវ​បារម្ភ​ក្នុង​ការ​បន្ត​កុងត្រា​ថ្មី”។

អតីត​កីឡាករ Palermo ​ខាង​លើ ​ចូល​លេង​ឱ្យ​ក្រុម​សេះ​បង្កង់​តាំង​ពី​ឆ្នាំ​២០១៥​មក ហើយ​រដូវ​កាល​នេះ​រូបគេ​មាន​ភាព​លេច​ធ្លោ​ខ្លាំង​គួរ​ឱ្យ​កត់​សម្គាល់​ទាំង​លេង​នៅ​ពាន​អន្តរជាតិ​និង​លីគ​អ៊ីតាលី។ ដោយ​ហេតុ​ដូច្នេះ​ហើយ ​បាន​ជា​មាន​ក្លឹប​ធំ​ៗ​ច្រើន​ចង់​ទិញ​គេ​ទៅ ​ស្រប​ពេល Juventus ​ក៏​បាន​បន្ត​កុងត្រា​ថ្មី​ឱ្យ​ភ្លាម​ៗ ​ព្រោះ​ខ្លាច​គេ​ឆក់​យក​បាត់៕