កិច្ចប្រជុំនៃគណៈកម្មាធិការដាក់ពិន័យនេះដែលត្រូវបានធ្វើឡើងក្រោមការដឹកនាំ លោក ចំរើន វ៉ាន់ថា ទីប្រឹក្សាក្រសួងវប្បធម៌និងវិចិត្រសិល្បៈ និងជាអនុប្រធានលេខាធិការដ្ឋានជំនួយការក្រុមប្រឹក្សាពិន័យនិងលើកសរសើរបានប្រកាសជាថាតារាសម្តែង ដេននី ក្វាន់ត្រូវទទួលការពិន័យមួយឆ្នាំ មិនចេញមុខលើកម្មវិធីសិល្បៈនានាបន្តទៀត។
លោក ចំរើន វ៉ាន់ថា បានឲ្យដឹងទៀតថា ក្រុមប្រឹក្សាពិន័យនៃក្រសួងវប្បធម៌និងវិចិត្រសិល្បៈបានធ្វើការសម្រេចថា ទី១.ក្រសួងវប្បធម៌សម្រេចដាក់ពិន័យ កញ្ញា ដេននី ក្វាន់ មិនឲ្យធ្វើសកម្មភាពពាក់ព័ន្ធ ជាមួយនឹងវិស័យសិល្បៈវប្បធម៌រយៈពេល១ឆ្នាំ ចាប់តាំងពីថ្ងៃចុះ ហត្ថលេខា ទៅលើលិខិតនេះតទៅ។ ទី២. ក្រសួងវប្បធម៌ ក៏ដូចជាក្រុមប្រឹក្សាពិន័យ ក៏បានសំណូមពរ និងស្នើដល់សមាគមសិល្បៈទាំងអស់ ស្ថានីយទូរទស្សន៍ ផលិតកម្មនានាសូមចូលរួមសហការ ជាមួយនឹងក្រុមប្រឹក្សាពិន័យចំពោះការដាក់ពិន័យទៅលើ កញ្ញា ដេននី ក្វាន់ នេះ ដោយសុំសំណូមពរមិនឲ្យយកតួនេះទៅថត ទាំងរឿង និងស្ពតពាណិជ្ជកម្មផ្សេងៗ។ ទី៣. កិច្ចប្រជុំបានស្នើដល់ផលិតកម្មទាំងអស់ពេលចង់បានតួថត ឬសម្ដែងក្នុងរឿងរបស់ខ្លួន គួរធ្វើការទំនាក់ទំនងតាមរយៈ សមាគមសិល្បៈដែលមានស្រាប់ ដើម្បីការពារហានិភ័យ ឬការរិះគន់ណាមួយកើតឡើងនូវណាប្រការណាមួយទៀត។
សូមបញ្ជាក់ផងដែរថា ការដាក់ពិន័យលើ កញ្ញា ដេននី ក្វាន់ បានធ្វើឡើងក្នុងកិច្ចប្រជុំដែលក៏មានវត្តមាន ប្រធានសមាគមភាពយន្ត លោក ឆាយ បូរ៉ា, ប្រធានសមាគមសិល្បករខ្មែរ លោក សុះ ម៉ាច និង តំណាងសមាគមមិត្តសិល្បៈស្ម័គ្រជួយសង្គម ដែលមានស្វាមី ចន ច័ន្ទលក្ខិណាគឺ លោក ហេង ឡុង ជាតំណាង ដោយអ្នកទាំងបីនាក់នេះ បានឯកភាពទាំងស្រុងចំពោះការដាក់ពិន័យលើ កញ្ញា ដេននី ក្វាន់ មិនឲ្យមានសកម្មភាពរយៈពេល១ឆ្នាំ ខណៈដែលសាមីខ្លួនផ្ទាល់ ដេននី ខ្វាន់ មិនបានបង្ហាញខ្លួនចូលរួមក្នុងកិច្ចប្រជុំតាមការអញ្ជើញឡើយ។
សូមបញ្ជាក់ថា កិច្ចប្រជុំនេះ ត្រូវបានធ្វើឡើងជាលើកទី២ ដោយលើកនេះមានទ្រង់ទ្រាយទំបន្តិចដោយមានតំណាងពីសមាគមនានាចូលរួម ជុំវិញតារាសម្តែងសិចស៊ី ដេននី ក្វាន់ ដែលមិនបានធ្វើតាមការណែនាំរបស់ ក្រសួងវប្បធម៌និងវិចិត្រសិល្បៈ ៕
ប្រភព៖ rasmeinews.com
0 comments:
Post a Comment