(ភ្នំពេញ)៖ គ្រាន់តែបើកបរបញ្ច្រាសទិសគ្នាសម្លឹងមុខគ្នា បានបត់ម៉ូតូតាមសួរនាំបង្កជាហិង្សាវាយតប់ បណ្តាលឲ្យរងការខូចខាតម៉ូតូ តែមិនមានរងរបួសដល់មនុស្សទេ។ ហេតុការណ៍នេះបង្កឲ្យមានការភ្ញាក់ផ្អើលឡើងនៅវេលាម៉ោង៩យប់ ថ្ងៃទី១០ ខែកក្កដា ឆ្នាំ២០១៧ ជិតភោជនីយដ្ឋានម្លប់ស្វាយ៩៩ ផ្លូវបេតុង ភូមិសន្សំកុសល២ សង្កាត់បឹងទំពុន ខណ្ឌមានជ័យ។ ជនរងគ្រោះមានឈ្មោះ ឡាក់ លីម៉េង ភេទប្រុស ឆ្នាំ២១ឆ្នាំ មុខរបរធ្វើការនៅក្រុមហ៊ុនឯកជន ស្នាក់នៅផ្ទះជួល ភូមិសន្សំកុសល២ សង្កាត់បឹងទំពុន ខណ្ឌមានជ័យ ជិះម៉ូតូម៉ាក គូបជ្រុង C90 ពណ៌ទឹកប៊ិច ពាក់ស្លាកលេខ ភ្នំពេញ 1BC-5194។ ចំណែកខាងភាគីបង្កមានឈ្មោះ នេត ម៉ាលែន ភេទប្រុស អាយុ១៩ឆ្នាំ មុខរបររត់ម៉ូតូ ស្នាក់នៅផ្ទះជួល ភូមិសន្សំកុសល២ សង្កាត់បឹងទំពុន ខណ្ឌមានជ័យ ចំណែកម្នាក់ទៀតត្រូវជាបងប្រុសបានរត់គេចខ្លួន ជិះម៉ូតូសណ្តោងរ៉ឺម៉ក។
តាមសម្ដីជនរងគ្រោះបានឲ្យដឹងថា មុនពេលកើតហេតុ រូបគេបានជិះម៉ូតូម៉ាក គូបជ្រុង ពណ៌ទឹកប៊ិច ចេញពីផ្ទះ គោលបំណងទៅលេងផ្ទះមិត្តភក្ដិ ដោយបានធ្វើដំណើរតាមផ្លូវ បេតុងអត់លេខ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ បានជ្រុលរកទៅបុកគ្នានឹងម៉ូតូសណ្តោងរ៉ឺម៉កដែលជិះដោយគ្នាពីរនាក់ ក្នុងទិសដៅបញ្ច្រាសទិសគ្នា តែមិនបានបុកគ្នានោះទេ។ តែពេលនោះភាគីខាងរ៉ឺម៉កបានសម្លឹងមើលមុខ និងស្រែកថាឲ្យរូបគេ ធ្វើរូបគេជាជនរងគ្រោះខឹង បានជិះបត់ត្រលប់ក្រោយទៅតាមសួរខាងរ៉ឺម៉កដែលជិះគ្នា២នាក់វិញ ទើបកើតបានជាហិង្សាវាយគ្នាទៅវិញទៅមក តែមិនរងរបួសស្នាមនោះទេ គឺគ្រាន់តែខូចខាតម៉ូតូរបស់គេតែប៉ុណ្ណោះ ដោយសារតែខាងរ៉ឺម៉កបានយកដុំឥដ្ឋវាយ។ ប្រភពដដែលបានបន្តទៀតថា បន្ទាប់ពីបង្កហិង្សាដាក់គ្នារួចមក ឃើញមានសមត្ថកិច្ចមូលដ្ឋានបានចុះទៅដល់ និងឃាត់ខ្លួនបានមនុស្ស២នាក់ទាំងរូបគេផ្ទាល់ព្រមទាំងម៉ូតូ២គ្រឿងយកទៅសាកសួរនៅប៉ុស្តិ៍នគរបាលបឹងទំពុន។
ដោយឡែកអ្នកម៉ូតូសណ្តោងរ៉ឺម៉កវិញ បានឲ្យដឹងថា មុនពេលកើតហេតុ រូបគេ២នាក់បងប្អូន បានជិះម៉ូតូសណ្តោងរ៉ឺម៉កចេញពីដឹកអីវ៉ាន់ឲ្យម៉ូយហើយគោលបំណងត្រលប់ទៅផ្ទះ ដោយបានធ្វើដំណើរតាមផ្លូវបេតុងខាងលើ លុះមកដល់ចំណុចកើតហេតុ ក៏ស្រាប់តែមានបុរសខាងលើ មិនថាមានរឿងអ្វីនោះទេ បានជិះម៉ូតូមកសម្លឹងមើលមុខពួកគេ ថែមទាំងចង្អុលមុខទៀត ពេលនោះធ្វើឲ្យពួកគេទប់កំហឹងមិនបានទើបជ្រុលដៃវាយគ្នាទៅវិញទៅមកតែម្តងទៅ ហើយនៅពេលដែលវាយគ្នារួច ពួកគេត្រូវសមត្ថកិច្ចឃាត់ខ្លួនបានម្នាក់ ចំណែកម្នាក់ទៀតត្រូវជាបងប្រុសបានរត់គេចខ្លួនបាត់។
ក្រោយពេលកើតហេតុ បន្ទាប់ពីសមត្ថកិច្ចធ្វើការសាកសួររួច ភាគីខាងម៉ូតូគូបជ្រុង ដែលជិះគ្នាម្នាក់ឯង បានទារសំណងថ្លៃការជួសជុលម៉ូតូចំនួន១០០ដុល្លារ ពេលនោះដែរខាងម៉ូតូសណ្តោងរ៉ឺម៉កបានដឹងខ្លួនខុស ក៏សុខចិត្តយល់ព្រមសងចំនួន១០០ដុល្លារ ដើម្បីបញ្ចប់រឿង។ តែពេលសម្របសម្រួល និងផ្តិតមេដៃរួច ខាងជនបង្កអត់ទាន់មានលុយសង បានសុំទុករ៉ឺម៉ូតូសណ្តោងរ៉ឺម៉ក នៅប៉ុស្តិ៍នគរបាលបឹងទំពុន ជាសម្អាងសិន លុះចាំព្រឹកឡើងរូបគេរកលុយបានទើបមកលោះយកម៉ូតូសណ្តោងរ៉ឺម៉ករបស់ខ្លួនវិញ៕
ប្រភព៖ kdaokdao
0 comments:
Post a Comment