ពណ៌របស់ស៊ុតក្រហម អាចបញ្ជាក់ពី ....

នៅពេលគោះបំបែកស៊ុតម្តងៗ អ្នកប្រាកដជាមិនដែលចាប់អារម្មណ៍អំពីពណ៌ របស់ស៊ុតក្រហមឡើយ។  ផ្នែកក្រហម របស់ស៊ុតខ្លះ មានពណ៌លឿង ខ្លះបែរជាមានពណ៌ទឹកក្រូច  ហើយអ្នកប្រហែលជាមិនដឹងទេថា ពណ៌របស់វាសុទ្ធតែអាចបញ្ជាក់ ពីគុណភាពរបស់ស៊ុតបាន។
ជាការពិតណាស់ ផ្នែកក្រហម នៃស៊ុត អាចមានពណ៌ខុសៗគ្នា អាស្រ័យលើប្រភព ព្រមទាំងកម្រិតសារធាតុចិញ្ចឹម របស់វាផ្ទាល់។

ផ្នែកក្រហម ដែលមានពណ៌ទឹកក្រូច ឬពណ៌កាន់តែដិតខ្លាំង គឺមានសារធាតុចិញ្ចឹមកាន់តែច្រើន។ មាន់ដែលចិញ្ចឹមតាមបែបធម្មជាតិ មិនត្រឹមតែស៊ីគ្រាប់ធញ្ញជាតិ និងពោតប៉ុណ្ណោះទេ វាថែមទាំងស៊ីសត្វល្អិត និងបន្លែ ថែមទៀត ហេតុនេះហើយ ពង (ស៊ុត) របស់វា គឺមានសុខភាពល្អ និងមានសារធាតុចិញ្ចឹមច្រើនជាងមាន់ដទៃ។
សម្រាប់ស៊ុត ដែលទិញនៅតាមផ្សារទំនើប ច្រើនតែជាស៊ុតមាន់ចិញ្ចឹមកសិកម្ម និងស៊ីតែចំណី ដែលគេកំណត់តែប៉ុណ្ណោះ។ ស៊ុតក្រហមមានពណ៌លឿងស្រាលនេះ មិនបង្កផលប៉ះពាល់អ្វី ដល់សុខភាពនោះទេ ប៉ុន្តែទន្ទឹមនឹងនោះដែរ អ្នកក៏មិនអាចទទួលបានសារធាតុចិញ្ចឹមគ្រប់គ្រាន់ពីវាដែរ។

គួរបញ្ជាក់ផងដែរថា ស៊ុតក្រហមដែលមានពណ៌ទឹកក្រូចដិត មានផ្ទុកវីតាមីន E វីតាមីន A និងអូមេហ្គា ៣ ច្រើនលើសលុប ដែលអាចជួយដល់ចរន្តឈាម ការពារអុកស៊ីតកម្ម ពង្រឹងក្រសែភ្នែក ពង្រឹងសុខភាពឆ្អឹង ជួយកាត់បន្ថយកូឡេស្តេរ៉ូល និងសម្ពាធឈាម បានយ៉ាងល្អប្រសើរ។ ជាពិសេស មិនដូចអ្វីដែលអ្នកធ្លាប់គិតនោះទេ ស៊ុតមាន់នេះ មានកូឡេស្តេរ៉ូល និងជាតិខ្លាញ់ ទាបជាងស៊ុតមាន់កសិកម្មឆ្ងាយណាស់៕

ប្រភព៖ khmerload